Daning : Yono Daryono

GEMIYEN segurunge Gedong Olang Raga atawa GOR, darani Wisanggeni, arane GOR Tegal. Gubernur Jawa Tengah wektu semana taun 1988 Bapak HM. Ismail sing ngresmikna nang pidatone kocape nakokna, bisane arane GOR Tegal. Kiye gedong ana nang dalan Wisanggeni, apike tah darani GOR Wisanggeni.

Krungu pidato Gubernur kaya kuwe Walikota Tegal sing wektu samono Bapak Samsuri Mastur blingsatan toli ngomong-ngomongan dewek karo Bapak Sukamto Kepala P dan K wektu samono sing intine GOR Tegal arane kudu diganti GOR Wisanggeni.

Dadi aran GOR Tegal umure mung sedina wektu peresmian tok ngesuke diganti GOR Wisanggeni nganti saiki.

Darani Wisanggeni kejaba manggon nang dalan Wisanggeni jarene Bapak Ismail, luwih sreg nganggo aran wayang sing maknane racun geni, toli sakti madraguna.

Wisanggeni kuwe Wong Edan tapiken dudu edan sing sebenere edan. Wong Edan sing netepna bener ya bener, kudu bener.

Sering ora preduli kahanan lan karo sapa bae sing lagi diadepi. Wong Edan sing ora duwe wedi, malahan Edane Wisanggeni ndadekna dewa-dewa pada wedi karo omongane. Sing kaya kuwe memper karo wateke Wong Tegal.

Selugune mbang lore GOR Wisanggeni kuwe disiapna nggo gedung kesenian. Jare Bapak Masturi Mastur komplek GOR Wisanggeni ana panggonan nggo olah raga ana panggonan nggo olah rasa.

Man Damin wektu samono wis nyiapna gambar Gedong Kesenian nang komplek GOR Wisanggeni, ujude segurungan manjing gedong utama, ana ruang pamerane. Mung bae segurune klakon mbangun gedong kesenian, Bapak Samsuri Mastur wurung dadi walikota sing limang taun ke lorone.

Sidane pekarangan mbang lore GOR Wisanggeni dadi lapangan tenes nganti saiki. Man Damin tau ngresula maring Kepala DPU wektu semono Kang Wahyudi almarhum, bisane dadi lapangan tenes. Semaure Kang Wahyudi aja watir enggo tak usulna gedong PKK ben diapiki.

Akeh wong Tegal sing ora ngarti sapa kuwe Wisanggeni, ngertine mung arane salah sijine wayang.

Lugune akeh wong Jawa sing ngidolani Wisanggeni, wong Balaikota sing arane Kang Dinar Marnoto, dong nang Facebook luwih seneng arane Dinar Wisanggeni.

Aran kiye lamon gawe status nang FB apa maning lagi walikotane Siti Masitha Soeparno, deweke gemese por, sering ngritik.

Ora mung Kang Dinar Wisanggeni akeh pejabat Pemkot sing dinonjob, ora dingein jabatan ora dingein pegawean.

Sa oran-oran ana limalas pejabat sing ora di reken daning walikota (nonaktif) Siti Masitha Soeparno nganti rong taun. Dinar Wisanggeni salah sijine sing disengit daning walikota Siti Masitha Soeparno, walikota sing ditangkep KPK.

Wong sing dinonjob daning Siti Masitha Soeparno uga sing disinggkirna dadi pejabat ora trep karo kepinteran lan pangkate saiki wis pada dibalakna ganing PLT Walikota Bapak Nursholeh, malah ana sing munggah jabatane kaya Nok Novi Sumadi sing saiki arang-arang pit-pitan lan Kang Dinar Wisanggeni.

Man Damin melu bungah Kang Dinar Wisanggeni dadi Kabid Kebudayaan mergane lagi gurung pangsiun Man Damin pancen ngarepna Kang Dinar Wisanggeni atawa Kang Firhad nang Kebudayaan sing wektu samono melune Kantor Dinas Pemuda, Olahraga, Kebudayaan dan Pariwisata.

Kang Dinar mesti duwe alesan sing trep bisane njukut aran Wisanggeni. Wisanggeni kuwe ora preduli sapa bae sing repan diobong ora mungsuh ora sedulur, tanggga atawa batire dewek adong nyimpang ora bener dilawan, mung siji sing dilakoni : mbela sing bener toli sing batil kuwe dadi mungsuhe.

Wisanggeni kuwe kaya Wa ne yakuwe Bima, ora bisa basa kromo adong ngomong karo sapa bae blakasuta apa anane. Sering nggebuki dewa-dewa adong pada crengkeng klakuane ora bener. Saking saktine, ora mung raja sing kocar-kacir Betara Guru bae nganti kedangdapan mudun maring dunya, padahal nggone nang kahyangan.

Dinar Wisanggeni saiki dadi Kabid Kebudayaan len tokna “kesaktiane” sing bisa nggo agulan, ana gedung teater arena nang Taman Budaya Tegal (TBT) komplek Pusat Promosi dan Informasi Bisnis.

Aja pleng-plengan kuwe tembe gedung teater arena sing wis dadi gurung liyane kaya pendopo agung, wisma seni, teater nang lataran, kolong pameran lan liyane.

Batir-batir seniman Tegal ngarepna Taman Budaya kuwe nggo pusate Kesenian seniman Pantura mbang kulon, ora mung kota Tegal tok, tapiken nggo seniman karesidenan Pekalongan lan Banyumas.

Peraturan Daerah TBT prelu dibenahi, paling ora Perwale eben nggo kreasi seniman sewane ora larang, atawa digratisna sisan, wong Komisi 1 DPRD ne bae wis ora nargetna maning.

Kejaba kuwe, prelu gawe Perda bab UPTD Taman Budaya Tegal, eben TBT kuwe ana sing ngragati ora kaya saiki kayong laka sing ngopeni.

Kaya kuwe sedulur, cerita Man Damin karyane Kang Yono Daryono, sing judule Dinar Wisanggeni. Mengko disambung maning karo cerita liyane. Suwun.

Tag: gor tegal

Dinar Wisanggeni