Lomba Maca Artikel Basa Tegalan

Daning : Dr Maufur

KYEH omongane Sekda Kota Tegal, Bapak Edy Pranowo SH MM. “Angger dina wingi, sing melu jed-jedan maca artikel basa tegalan, akehe asli wong Tegal, dadi ndean macane rada tata.

Nah saiki, sing melu kepala-kepala SKPD, akeh wong saka wetan, ndean bae macane pating pecotot lan blekak-blekuk. Tapine yen akeh sing wis pada genau, ndean ta macane ya lancar. Sing jelas dina kiye luwih rame tinimbang wingi. Kabeh kiye ndean, dadi saiki yuh pada bareng-bareng mbuktikena”. Lan sateruse.

Kuwe mau sambutane sekda ning moange jed-jedan maca artikel basa tegalan, ning pendopo Ki Gede Sebayu Balai Kota Tegal, tanggal 17-18 April 2012 dina kaping loro, sanjerone meringati dina dadine Kota Tegal ping 432.

Baca Juga: Awal Pekan, Harga Emas Antam Melesat Tembus Rekor Baru

Lagi pas nein sambutan moange lomba, sekda ora nganggo catetan, pokoke sakemutane sing wis dipikir sadurunge lan wektu kuwe. Dadi, ya ngomonge ana kagoke utawa salah ngucap. Pas rada keder lan klalen basa tegalane, kepala-kepala ya pada ngguyu.

Kayonge malah sadurung jed-jed maca artikel wis jed-jedan ngguyu disit moyoki sekda. Ndean mumpung lagi rahat-rahatan. Pas lagi digeguyu, sekda langsung mbegis. “Husss! Aja pada ngguyu disit.

Coba engko sampeyan kabeh kaya apa, nyong pan ndeleng anjog bubar”. Ya maklum, pak sekda gen sering ngomonge nganggo basa Indonesia, kecaba karo anake sing nomor loro, jare senenge nganggo basa tegalan.

Baca Juga: Gunung Slamet Keluarkan Asap Tebal Setinggi 200 M, Terjadi Gempa Low Frequency dan Tremor Menerus

Bener bae, lomba maca artikel basa tegalan sing dipeloni kepala-kepala SKPD rame nemen.

Ana sing protes, “Bisane judule lomba, ora jed-jedan?”, ana sing usul supaya waktune ditambah saka lima menit dadi enem menit. Ana sing takon, “Bisane pak Maufur ngaku turu tapi ana wong ngomong ka krungu”.

Ana uga sing sadurunge maca ngomentari ndisit, tur ana sing ngomongna alesane bisane milih judul artikel rebutan balung garing. Ana maning, sing arane Lurah Randu Gunting, maju nomor 36, malah macane sakepenake dewek. Lan liya-liyane.

Luwih ger-ger maning, barang pada maca akeh sing pada salah. Tulisan “Ana kabar apa ?”, diwaca “apa kabar”. “koreng mrabah”, diwaca “goreng mrabah”. Tulisan, “aku kye turu, aja pitnah”, eh malah diwaca, “aku kye pitnah, aja turu”.

“Langganan”, diwaca, rangda-nan. “Pareman” alias pupuran, eh diwaca “parman”. Parman tah sing dodol bubur kaca ijo owh. Lah yen kye tah awagan, “salugu-lugune”, diwaca “sagulu-gulune”. “Randu alas”, kewaca “Rangda alus”. “Pangkutangan culak culek”, mung diwaca “kutang ucal-ucul”. Wis ora usah diterusna ceritane, pindah babakan bae.

Giliran maju kepala Rumah Sakit Kardinah. Deweke sakuat tenaga maca artikel basa tegalan. Maklum bae, asale saka wetan tur sing penting melu. Ya bongan pancen kudu melu. Kabeh huruf akhiran “a” diwaca “o”.

Kecaba yen penonton ngemutna “a”, nembe deweke ngulangi moni “a”. Tapi akhire rampung pas karo waktune. Nyong ndeleng deweke kayong kesel, tur ya penonton ana sing takon, “kesel pak?”. Pak dokter Abdal Hakim ora njawab, langsung marani jagongane, sebab masih rengosan.

Sauwise kuwe, maju kepala lingkungan hidup. Sadurunge maca deweke usul ndisit, “yen nyong maca kye aja dipedot anjog rampung”. Jare panitia, “ya wis ora papa, mangga”. Baris per-baris diwaca radan ati-ati tur alon-alon.

Maksude supaya ora pada salah. Lah ning sanjerone maca, pancen salahe ora pada, tapine tetep pada salah. Malah ana salah sijine penonton sing ora katon nuntun. Butuh waktu luwih suwe tinimbang liyane, akhire tah pragat.

Ndelengna lan ngerongokena direktur rumah sakit karo kepala lingkungan hidup maca artikel basa tegalan kayong kempis-kempis, nyong dadi kemutan gemiyen lagi egin sekolah.

Kayonge ngerasakena pada bae, lagi dikongkon maca basa Jawa Solo utawa Jogya. Murid-murid Brebes-Tegal, ka dikongkon genau basa emane utawa ibune wong liya, ya jelas blekak-blekuk lan krasa kesiksa.

Lamunane enyong pedot, marga giliran bu Herlin maju. Sadurunge maca, deweke ngomong ndisit. “Nyong ya pada bae karo kanca-kanca. Wis sinau awit wingi-wingi, tapine masih radan angel. Muga-muga ora kaya pak Giyanto”. Naaahhhhh, moanglah bu Herlin.

Baris perbaris diwaca ngati-ati, lan pancen bener tur lancar. Dadi ora kajogan genau pirang-pirang dina. Tapine bu Herlin kye dinein wektu karo panitia nggo maca artikel ping-pingdo tinimbang liya-liyane.

Liyane nem menitan, bu Herlin anjog rolas menit luwih. Pengen ngarti sebabe? Lagi enak-enak maca anjog tengah-tengah, krungu adan asar saka masjid lan musola balaikota. Lah lagi maca Al-Quran krungu adan bae kudu mandeg, apa maning maca artikel.

Jare panitia, “manteg disit, adan rampung, diterusna maning”. Bu Herlin ngenteni adan entek karo tetep ngadeg ning panggung.

Batine ndean, ora juara gen ora papa, sing penting melu ngopeni basa tegalan, sebab Tegal panggonan sing Gusti Allah, nein pangurip-ngurip deweke lan keluargane.

Kaya kuwe sedulur, cerita karyane Maufur sing judule "Lomba Maca Artikel Basa Tegalan". Mengko bakal disambung maning karo cerita liyane, suwun.